Bibliotheca Julia

Julius dux Brunsvicensis et Lunaeburgensis

Julius dux Brunsvicensis et Lunaeburgensis (1528-1589; regnavit ab anno 1568) Bibliothecam Juliam saeculo sexto decimo medio instituit. Collectionis enim vestigia iam anno 1550 inveniri possunt. Libris Michaelis de Caden (ob. 1561), camerae imperialis syndici, coemptis bibliotheca non mediocriter amplificata est. Eo tempore, quo dux Augustanam confessionem introduxit, monasteriorum in Woeltingerodo (monachae cistercienses, 85 mss.), Steterburgo (monachae augustinianae, 27 mss.), Dorstadt (monachae augustinianae, 20 mss.), Heiningen (monachae augustinianae, 34 mss.), Marienbergo apud Helmstadium sito (monachae augustinianae, 292 mss. et libri impressi), Lamspringe (monachi benedictini, 16 mss.), Amelungsborn (monachi cistercienses), bibliothecas in Guelferbytanam arcem traducendas curavit. Tam emptio librorum Johannis Aurifabri (1519-1575) quam heredium de bibliotheca Sophiae Poloniae Lithuaniaeque (1522-1575), novercae Julii et duci Henrico Iuniori matrimonio altero coniunctae, magni momenti erant.

Henricus Julius dux

Julii filio Henrico Julio (1564-1613, regnavit ab anno 1589) regnante bibliotheca Julia plures collectiones pretiosas, imprimis codices medio aevo posteriore conscriptos, ex monasteriis Montis Sancti Georgii prope Goslariam (monachi augustiniani), Brunshausen prope Gandersheim (monachae benedictinae), Hamersleben (monachi augustiniani) accepit. Anno 1597 dux emit collectionem Matthiae Flacii Illyrici (1520-1575), theologi Lutherani, ex 165 codicibus manuscriptis et 717 libris typis expressis constantem. Bibliothecae eo modo auctae multi codices et libri in Germania, Austria, Britannia Galliaque saeculis medii aevi perfecti inerant.